SARATOK, 19 Okt: Pengawa ngatur Program MOTAC Begulai Enggau Komuniti endang siti ari inisiatif Opis Menteri Dagang Temuai, Seni enggau Main Asal (MOTAC) dikena ngedut kaul enggau mensia mayuh ke diau ba menua pesisir.
Sapit Kepala Sekretari (Pengatur Pengawa) MOTAC, Dato Shaharuddin Abu Sohot madah pengawa ngatur program nya endang manah awakka komuniti ulih ngelala bagi peluang ekonomi ke ulih diserungkai nengah aktiviti dagang temuai.
“Program penyedar baka tu betuju dikena nambahka pemereti ati kitai pasal peluang dagang temuai enggau baka ni chara kitai mantu ngerembaika sektor tu.
“Dagang temuai endang siti ari sektor ke pemadu dinamik enggau mantu sechara langsung ngagai pemansang ekonomi ba renggat lokal.
“Nya alai, dagang temuai patut meri pemaik ngagai komuniti lokal nengah program dagang temuai ke udah dilanggur enggau manah iya ulih nyungkak tikas pengidup peranak lokal,” ku iya.
Iya mansutka pekara nya maya Program MOTAC Begulai Enggau Komuniti di Sarawak diatur ba Dewan Sri Krian Saratok, kemari.
Ku iya, aktiviti dagang temuai ke udah dilanggur enggau manah deka meri pemaik ngagai sosio ekonomi sereta nyungkak tikas pengidup rayat.
Tandu iya, aktiviti dagang temuai mega endang sebengkah ari aktiviti ke udah dirintaika dalam prinsip Malaysia Madani.
Ku terang iya, pengawa ngatur program baka nya chukup manah laban ulih meri penyedar enggau buah penemu baru ngagai mebsia mayuh bekaul enggau industri dagang temuai ba menua diri.-TVS
