SARATOK, 18 Okt: Sektor dagang temuai antara siti pekara besai ke mayuh mantu nyungkak tikas sosio ekonomi komuniti di menua pesisir.
Kaban Kunsil Nengeri (ADUN) Krian Friday Belik madah, nengah sektor dagang temuai mega mayuh muka peluang gawa ngagai mensia mayuh lebih agi di menua pesisir.
“Dagang temuai endang siti ari pekara ke mantu nyungkak ekonomi ba renggat lokal nengah dagang temuai.
“Mayuh peluang gawa ulih dibuka kelimpah ari nya mega, sektor-sektor dagang lokal mega ulih ngerembai asil ari aktiviti dagang temuai lokal.
“Penatai temuai muar meri peluang ngagai kitai dikena mantaika budaya, pengawa asal enggau penyelai komuniti kitai ngagai dunya.
“Dikena nentuka industri dagang temuai meri pangka besai enggau ngasi ngagai pelilih tu, pemanah sukung ari pengani lokal enggau komuniti mega chukup beguna,” ku iya.
Iya mansutka penerang nya maya Program MOTAC Begulai enggau Komuniti di Sarawak ke diatur ba Dewan Sri Krian Saratok, sehari tu tadi.
Ku terang iya, program nya chukup engkeman enggau juluk dikena negapka peneleba diau ba homestay tauka rumah temuai ba pelilih menua Saratok.
Ba pengawa dikena matak penatai temuai ku iya, komuniti menua pesisir patut ngetanka budaya enggau pemanah rampa menua dikena nentuka pengelantang meruan dijaga.
Ku iya, program ti keterubah iya diatur ba pelilih Saratok tu mega endang atur berat dikena ngenegapka kerejasama antara komuniti menua pesisir enggau industri dagang temuai.
Sama bisi datai Sapit Kepala Sekretari (Pengatur Pengawa) Opis Menteri Dagang Temuai, Seni enggau Main Asal (MOTAC), Dato Shaharuddin Abu Sohot, Direktor Opis MOTAC Sarawak, Debbie Jenggut Nyelang, Direktor Kaunsil Penyungkak Dagang Temuai Malaysia (Tourism Malaysia) Sarawak, Nurul Ain Mohammed Yunus enggau ke bukai.-TVS
