SPAOH, 18 Okt: Polis Diraja Malaysia (PDRM) Sarawak seruran sedia napi musin landas bekau ari ubah monsun timur laut ke dipelaban berengkah bulan tu.
Kepala Polis Sarawak, Dato Mancha Ata madah, raban sida deka ngatur aum penyeraris bekaul pangku pengawa begulai enggau ejensi penyah penusah enda lama agi.
“Nyadi baka selama bala taun-taun ke udah ba renggat Kontinjen Sarawak, dia Polis Diraja Malaysia nadai penanggul ari segi bejalaika pangku pengawa diri.
“Pia mega ba sukut pengereja pengawa enggau logistik nadai penanggul ari segi orang gawa enggau logistik.
“Nyadi enda lama agi PDRM Sarawak mega deka ngangauka semua ejensi-ejensi penyah penusah ke bekaul ngambi atur penyeraris dikena napi monsun timur tasik taun tu ia,” ku iya maya dirandau media pengudah Pengawa Bejadika Balai Polis Spaoh ke baru ditu, kemari.
Nangkan ke nya, Mancha madah, PDRM seruran sedia ari segi peminta guna logistik enggau pengereja pengawa dikena bejalaika pangku pengawa bekaul enggau tasah ngenyit nyengkaum mantu orang tasah bah.-TVS
