MIRI, 18 Okt: Urung 565 pengani ke nguan 103 pintu rumah panjai Kampung Long Bemang, Ulu Baram tiga hari udah tebunsa ketegal penusah ampuh bah kenyau Hari Tiga tu tadi.
Pengari Palan Operasyen (PGO) Opis Bomba enggau Penyah Penusah Malaysia (JBPM) Sarawak madah, bepelasarka ripo Gerempung Bomba Volunteer (PBS) Long Bemang beratika paras ai majak niki.
“Paras ai manggai 1.3 kaki penalam pukul 7.20 pagi tadi. Taja pia, gaya hari benung mambam.
“Sitak tu berengkah ampuh bah kenyau pukul 5 lemai Hari Tiga,” ku iya nengah sebengkah penerang sehari tu tadi.
PGO madahka pengawa matau dipejalaika PBS Long Bemang madahka agi nadai pengawa mindah dipejalaika ngagai Palan Pengenduh (PPS).
“Pengani ke tebunsa semina mindah ngagai sadau rumah diri empu magang,” ku iya.
Nitihka penerang bekal karan udah diputus Sarawak Energy Berhad (SEB) ba sitak ke tebunsa ampuh bah.- TVS
