SPAOH, 18 Okt: Pengawa ngaga balai polis baru di pelilih Spaoh endang senutuk enggau peminta dibaruh Akta Pengelikun enggau Pengerai Pengereja Pengawa 1994, ku Dato Mancha Ata.
Kepala Polis Sarawak nya madah nengah penembu balai polis baru nya deka mantu ngenegapka kualiti servis nyulut PDRM ngagai mensia mayuh lebih agi ba Spaoh.
“Pengawa ngaga balai polis ke baru tu ukai semina senutuk enggau peminta ba baruh Akta Pengelikun enggau Pengerai Pengereja Pengawa 1994 sereta mega seriris emhhai guna kemaya hari.
“Pia mega nengah pemisi perengka guna begunan ke lebih moden, balai polis baru nya dikeandal deka meri peransang gawa ngagai pengereja pengawa ba Balai Polis Spaoh.
“Sida deka terus bebendar gawa enggau ngangkatka kualiti servis dikena nentuka pengelikun enggau pengelantang mensia mayuh ba menua tu seruran tejamin,” ku iya maya bejaku bejadika Balai Polis Spaoh ke baru ditu, kemari.
Ku terang iya, pengawa ngagai Balai Polis Spaoh ke baru nya mega mandangka penyiru perintah Sarawak ngagai guna komuniti di Spaoh.
Balai Polis nya ngembuan pemesai 2.45 hentar berengkah digaga Februari 2019 sereta tembu penuh kena Ogos 2023.
Ungkus penuh ngaga balai polis nya manggai RM7, 445, 888 digaga nengah agih ari Projek Transformasyen Menua Pesisir (RTP) ADUN Bukit Saban.
Sama bisi datai Sapit Kepala Polis Sarawak Deputi Komisioner Datuk Ibrahim Darus sereta bala tuai polis pelilih ke besemak.-TVS
