KUALA LUMPUR, 18 Okt: Dikena nentuka rayat bulih gaji enggau upah ke chukup ungkup pengidup ke lebih lantang, dia perintah udah setuju nikika tikas gaji minimum ari RM1,500 ngagai RM1,700 sebulan.
Menteri Besai Datuk Seri Anwar Ibrahim madah, peniki gaji nya deka berengkah diterit 1 Februari 2025.
“Perintah seruran ngemeratka pasal penatai pemisi rayat. Pengawa ngatur ekonomi semina diasai mujur enti rayat bulih gaji engau upah ke reti nya ngasaika pengidup ke lebih lantang,” ku iya.
Anwar mansutka penerang nya maya mantaika Bajet 2025 di Parlimen sehari tu tadi.
Taja pia, ku iya perintah mega mutuska deka nangguhka atur gaji minimum RM1,700 ungkup pengaji ke kurang ari lima pengereja pengawa pengelama enam bulan.
“Pengawa nangguhka tu berengkah diteritka 1 Ogos 2025, dikena meri penendur ngagai pengaji mit dalam napi ubah tu,” ku iya.
Kelimpah ari nya, Opis Menteri Orang Gawa deka mantaika garis lalau berengkah ungkup semua sektor kereja.
Kenu ku iya, garis lalau tu deka nyadi malin ngaga pengereja pengawa, ambika chunto gaji bepun ungkup sekeda pangku pengawa baka juruteknik industri enggau pengeluar iya nya RM2,290, injinir mekanikal diberi RM3,380, enggau profesional penempa konten kreatif iya nya RM2,985.
Inisiatif tu dikearap ulih ngemanah pendiau ekonomi rayat enggau nyukung pemansang pengereja pengawa ke lebih lebih kompetitif.-TVS
