KUCHING, 16 Okt: Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar dichiri nyadi Chanselor Universiti Malaysia Sarawak (UNIMAS) ti keempat ngisi penuduk ke udah ditinggalka niang Tun Pehin Sri Abdul Taib Mahmud.
Pengawa beradat nyiri Tun Wan Junaidi nyadi Chanselor sehari tu tadi udah diatur ba Astana Nengeri.
Ba pengerami nya tadi, Tun Wan Junaidi madah diri nerima pangku pengawa nya laban deka neruska juluk tauka aspirasyen UNIMAS terus nempa penyulut dalam bidang akademik enggau pansik sekalika ba renggat nasional tauka antarabansa.
“Nyadi aku enggau ati ke baruh nerima tangkup pengawa besai tu.
“Aku nemu pangku pengawa nyadi Chanselor ba universiti ukai semina siti basa, tang ngesan tanggungpengawa besai.
“Tu ukai semina nyadi kelai ngagai universiti tu, tang beguna amat nyadi penyukung juluk UNIMAS ti deka terus nempa penyulut dalam bidang pansik sekalika ba tikas nasional tauka antarabansa,” ku iya.
Iya mansutka pekara nya rambau pengawa beradat nyiri Chanselor Universiti Malaysia Sarawak (UNIMAS ba Astana Nengeri Sarawak ditu.
Pengawa nya sehari tu tadi udah dipunka enggau jaku kelalu ari Mandal Canselor Unimas, Profesor Dr. Ahmad Hata Rasit sebedau, pengawa nyerahka surat chiri ari Dato’ Seri Diraja Dr Zambri Abdul Kadir.-TVS
