SARATOK, 16 Okt: Pengani Rumah Panjai Spencer Biju ba Lubok Sengelang Ulu Sebetan Roban ke kala dituntung penusah angus apin lama ke udah berengkah ngentak rumah baru ba taba asal rumah panjai nya.
Kaban Kunsil Nengeri (ADUN) Krian, Friday Belik madahka, dikena ngemujurka pengawa nya sepenyampau RM240, 000 agih udah diungkupka nengah Projek Nyeruri Rumah Seranta Sarawak (PPRMS).
“Pengawa ngentak baru tu udah berengkah dipejalaika kenyau tiga minggu ke udah enggau sehari tu aku meda pengawa nyungkur tanah nyau deka tembu,” ku iya.
Pengawa ngaga begian dapur rumah panjai nya deka berengkah pengudah pengawa nyungkur taba tembu dipejalaika dalam timpuh ke semak.
Ba penusah ti nyadi urung pukul 12.40 minit ngalih hari kena 21 Ogos taun tu tadi, urung 105 iku pengani rumah panjai nya lenyau endur diau pengudah rumah panjai sida angus lengis.
Taja pia, nadai penusah bebadi bisi diripotka dalam insiden nya.-TVS
