SARATOK, 16 Okt: Lebih RM2 juta asil bejual dikearapka ulih dijapai nengah pengawa ngatur Pesta Saratok enggau Regata Krian 2024.
ADUN Krian Friday Belik madah, juluk nya nemban seriris enggau rikod ke kala dijapai maya ngatur program ke sama taun nyin kemari ti nyendiaka lebih 400 bansa bejual sekumbang pengerami nya.
“Enti diperati ari segi temuai ke datai nyangka kitai ulih nyapai juluk baka taun-taun ke udah,” ku iya.
Iya mansutka pekara nya pengudah ngabas taba Projek Ngaga Baru Rumah Panjai Spencer Biju di Lubok Sengelang, Ulu Sebetan Roban kemari.
Lebuh ngelansa pasal penyampau temuai ke datai, Friday madah diri andal deka ngerikodka penambah bepelasarka rikod penatai temuai ke ngemataka panggau pemerindang ke udah berengkah diatur kenyau 4 Oktober ke udah ngayanka beribu iku datai ninting malam.
Ku terang iya, serak tu penyampau semua perais ke disediaka ungkup Regata Krian 2024 manggai RM109, 000.
Gelar Raja Sungai Regata Krian 2024 deka nerima perais RM15, 000.
Udah nya, bisi 25 achara besai bisi diatur sekumbang Pesta Saratok ke berengkah 4 nyentuk 27 Oktober tu.
Berebak enggau nya, Regata Krian deka berengkah 25 nyentuk 27 Oktober diatur Palan Servis ADUN Krian.-TVS
