SARATOK, 16 Okt: Pengawa ngatur Program Opis Menteri Dagang Temuai, Seni Enggau Budaya Malaysia (MOTAC) ba Dewan Komuniti Sri Krian kena 18 Oktober tu dipeda ulih nyadi langkah rapat dikena nyungkak industri ‘homestay’ tauka rumah temuai ditu.
Nya alai, Kaban Kunsil Nengeri (ADUN) Krian, Friday Belik meransang komuniti menua pesisir ngambika nguna manah pelasar nya dikena ngangkatka sektor dagang temuai ba sitak nya.
Ku iya madah, nengah program nya dia raban penyereta lebih agi komuniti lokal diberi pengeludas enggau penambah pengelandik sereta meransang pemansang ekonomi ba menua diri.
“Ngarapka program homestay (rumah temuai) tu ila ulih nyadi siti ari aktiviti ke tau nyungkak penatai pemisi kitai ba rumah panjai.
“Ari kitai ke nerima temuai datai baik ari nengeri tauka ari menua luar laban orang tu (temuai) datai nyadi begunaka alai bemalam.
“Nya alai, tepulai ngagai kitai ngempu rumah ngempu bilik tadi baka ni ku kitai ngatur pendiau sida ari segi chaj rega bemalam ba rumah kitai.
“Tu mih ari program baru ditu ulih nulung kitai rumah panjai nambahka penatai pemisi tauka ekonomi (menua),” ku iya.
Iya nerangka pekara nya ngagai media pengudah aum kepenudi pengawa ngatur Program MOTAC 2024 Begulai Enggau Komuniti di Dun Krian ditu, kemari.
Nangkan ke nya, Friday mega ngarapka nengah program nya ulih ngidupka baru enggau nyungkak potensyel homestay nyadi siti daya pematak temuai di pelilih Saratok.
Tandu iya, naka tu bisi 30 buah rumah panjai ba sitak nya udah ditetapka nyadi pemungkal ngagai program nya.-TVS
