KUCHING, 15 Okt: Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar deka bejadika pengawa nangguh Regata Sarawak 2024 ba Waterfront Kuching kena 3 November tu ila.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madahka, Tun Dr Wan Junaidi mega deka datai ngemataka Pekit Lumba Perau Naga Antarabansa Sarawak 2024 ti deka diatur kena 25 nyentuk 27 Oktober tu.
“Kebendar iya, penemuai kami iya nya dikena ngangauka TYT datai ngulu dua achara besai iya pengawa bejadika Festival Gendang kena 1 November enggau mega kena 3 November, iya nya pengawa nutup hari kepenudi Regata.
“Tang TYT madahka iya mega deka datai meda Lumba Perau Naga Antarabansa ti deka diatur berengkah 25 Oktober nyentuk 27 Oktober, nyadi nya mih tuju penemuai kami ke Astana pagi tu,” ku iya.
Kelimpah ari nya, Karim madahka , Regata Sarawak 2024 ti diatur kena 1 nyentuk 3 November tu ila nerima sambut ti manah laban perais mata duit serak tu bisi ditambah enti dibanding sebedau tu.
“Regata Sarawak taun tu nerima sambut ti chukup manah, aku nemu pengatur ngeletakka tatak penyampau penyereta dalam pekit laban kelalu mayuh ti deka ngambi bagi dalam pekit nya,”ku iya.
IYA mansutka pekara nya pengudah nemuai meri basa ngagai TYT Nengeri Sarawak Tun Dr Wan Junaidi ba Astana Nengeri, pagi tadi.
Tandu iya, Premier Sarawak Datuk Patinggi Tan Sri Abang Johari Tun Openg mega deka datai bejadika Pekit Perau Naga Antarabansa Sarawak ti diatur kena 25 nyentuk 27 hari Oktober tu.
Bisi 60 tim ari 21 buah menua udah ngenuku diri deka ngambi bagi dalam pekit nya, nyengkaum ari England, Ireland enggau Amerika Syarikat.-TVS
