SARATOK, 14 Okt: Agih belanja RM1 juta dikemendarka perintah Sarawak dikena ngaga jematan ke pengelantang pengani ari Rumah Panjai Lewis Nyamon di Tanjong Awik ngelawa Sekula Primari (SK) Lubok Kepayang Saratok.
Kaban Kunsil Nengeri (ADUN) Krian, Friday Belik madahka, tinda projek nya deka dibuka sebedau ujung taun tu.
Lebuh nerang senentang pengawa ngaga jematan ari Rumah Panjai Kerebau di Lubok Kepayang ngagai SK Lubok Kepayang, dia Friday madahka pelin asal dikena ngaga jematan nya deka diubah baru berindik ari pelin projek nya sebedau tu dua kali udah ditulak bala kunteriktor.
“Duit udah bisi udah ditinda dua kali. Tinda keterubah suba ngena ungkus RM500,000 semua orang ke ngantung tender nya ngelui magang tikam (ungkus) sida.
“Nya alai, aku udah berandau enggau DE JKR enti ulih minta tambah duit tambah baru RM350,000 ngujungka penyampau ungkus diatu RM850,000 ungkup tinda baru.
“Baka nya baru ga orang ke nikam (ungkus tinda) tender ngelui magang.
“Nya alai, diatu aku udah berandau enggau JKR enti ulih ubah pelin anang ngena pelin ke lama nyangka kelalu mar (ungkus) laban kitai sama bela nemu pemar orang ke gawa utai nya betebiang kelimpah nguna batu anchau,” ku iya.
Jematan Lubok Kepayang nyadi batang jalai ke suah dikena bala nembiak SK Lubok Kepayang ke datai ari empat buah rumah panjai besemak udah runtuh ketegal pangka kudi ba taun 2022.-TVS
