SARATOK, 14 Okt: Program Literasi Fungsian endang beguna bendar ngagai sida ngambika ulih nguasa 3M iya nya macha, ngira enggau nulis dikena napi dunya moden kemaya hari.
Ku siku ari penyereta program PLF, Unyi Bundak madah, sesi belajar ba program nya mega ulih mantu iya ngelala urup, macha sereta ngira enggau manah agi.
”Aku berasai gaga ati laban udah graduet ari Kelas PLF penemu ari sebedau tu sepi aku bisi endar betambah.
“Tu bekau ari pemandai suba endang nadai tentu tinggi laban deka gawa beribun ke bala menyadi.
“Nyadi tu diberi peluang baru belajar amat masa enda lama tang bisi ngasuh nemu utai ke baka ngelala ABC nyepil utai ke pandak-pandak, nemu bekenaka telepon nya udah ga nemu bisi endar pemansang sekula sepi aku taja enda lama,” ku iya.
Udah nya ba penemu Medol Guang, pengawa ngatur program PLF ti ngaul komuniti rumah panjai chukup besai reti ngagai iya.
“Pengabis manah tu laban kesatu ari segi iya aku ngumbai manah laban perintah meri salah munyi jaku, udah meri peluang ngagai orang ke enda nemu macha, ngira baka kami ketuai tu diatu udah nemu macha, nulis enggau ngira.
“Tu mih utai dikerinduka kami ba rumah panjai laban penemu ke diberi orang nya bisi ke penguntung kami ke belajar,” ku iya.
Bisi 44 iku pesereta ari tiga rumah panjai ba sitak DUN Krian bisi nyereta program serak tu ti udah dipejalaika kenyau enam bulan ke udah.-TVS
