SARATOK, 14 Okt: Peranak menua pesisir patut bisi penyedar bekaul bidang pelajar ti beguna bendar dikena nyungkak tikas pengidup sida jemah.
Kaban Kunsil Nengeri (ADUN) Krian, Friday Belik madah, peranak menua pesisir patut bisi pengelandik senentang teknologi pemadah (ICT) abis nadai ngembuan penau begunaka telepon pintar dikena nemu isu kemaya hari.
“Ari tua ke bisi penemu sereta ngembuan chukup informasyen nya ulih nambahka penemu sereta pengelandik diri.
“Nengah penemu nya, dia kitai deka muntang agi ngidupka diri.
“Nya kebuah, program tu manah amat ngambika muka runding rayat kitai di rumah panjai, diatu sida udah ulih enggau orang ngulihka penerang ke beguna ungkup diri empu,” ku iya.
Ku terang iya, bidang pelajar sebagi ari siti agenda besai perintah Sarawak nengah Pelin Strategi Pemansang Pasca Covid-19 (PCDS) 20230 ti deka nempa Sarawak nyadi wilayah ke maju manggai taun 2030.
Nya alai, iya ngarapka pengawa ngatur Program Literasi Fungsian ari opis KEMAS nya ulih meri penyedar senentang pemesai guna ngena ICT ba komuniti menua pesisir maya diatu.-TVS
