KUCHING, 14 Okt: Mesin ngembuah sawit bepelasarka teknologi baru ti dikeluarka Sarawak Plantation Berhad (SPB) dijangka ulih rembus ngagai makit antarabansa, ku Premier Sarawak Datuk Patinggi Tan Sri Abang Johari Tun Openg.
Ku iya, mesin ti dikumbai ‘lipan’ enggau ‘kerbau’ nya deka mantu ngurangka pemain industri bepanggai ba pengereja pengawa ari menua luar.
“Teknologi pemun udah bisi, kitai semina ngemanahka iya ari sukut efisyen lalu tu mesti dipejalaika sebuah kompeni.
“Nya alai, kitai mai sektor peribit baka SPB enggau Kaunsil Minyak Sawit Malaysia (MPOB) nyadi bakih ekuiti dalam kompeni tu.
“Kitai (Sarawak) nyadi pengeluar besai dalam industri minyak sawit ke alai makit ulih meli mesin tu laban kelapa sawit ukai semina di Malaysia aja tang di Asia Tenggara nyengkaum Indonesia enggau Afrika,” ku iya.
Iya madah munyi nya lebuh dirandau pemberita pengudah bejadika Pengerami Ngelancharka Pemindah Teknologi Sawit (TOT) ba Kaunsil Pemansang Industri Kontraksyen (CIDB) ditu, sehari tu tadi.
Tandu Abang Johari, mesin nya ulih ngembuah 1.2 tan minyak sawit dalam timpuh dua minit.
Ungkup rikod naka bulan Ogos 2024, Sarawak ngerikodka asil eksport sepenyampau 3.13 juta tan produk sawit enggau rega eksport lebih RM11.02 bilion ti nambah 13 peratus dibandingka enggau RM9.78 bilion ba taun 2023. – TVS
