KUCHING, 14 Okt: Komuniti orang berikan beguna dalam pemansang menua, kelebih agi mantu meri bekal ikan enggau asil tasik di menua tu enggau konsisten dikena nangkup guna rayat.
Chairman Kaunsil Pemansang Pengawa Berikan Malaysia (LKIM), Muhammad Faiz Fadzil madahka, perintah komited meri bantu ngagai komuniti orang berikan dikena nentuka sida terus dijaga sereta meransang sida ngambika lebih produktif dalam nambahka asil tangkap sida.
Ku iya madah, bantu ke disuaka ngagai sida ukai semina perengka berikan tauka mata duit aja, tang bisi mega bantu rumah diberi khas ngagai orang berikan.
“Aku berandau enggau bala bakih aku dalam bidang ekonomi lalu sida bisi sebana, sebana nama kebuah perintah patut meri mayuh bantu ngagai orang berikan.
“Perintah mega meri mayuh agi Bantu Pengawa Berumah, bisi sekeda rumah rusak, atap sida pechah enggau ke bukai, nyadi kami ngemanahka nya sechara pechuma,” ku iya.
Iya bejaku munyi nya rambau Program Rahmah Mesra begulai enggau raban orang berikan Gerempung Berikan Sri Muara (PNK Sri Muara) di Muara Tebas kemari.
Ba pengerami serak tu, lebih 100 iku orang berikan bela nerima bantu pukat sereta sekampit beras 10 kilogram siku.
Bala anak orang berikan mega bisi nerima beg enggau mata duit ungkup sida ke nampung pelajar ngagai tikas diploma enggau bachelor degree. -TVS
