LUBOK ANTU, 14 Okt: Pengani Rumah Panjai Skandis Kesit Lemanak ditu minta bantu raban ke bekaul lebih agi pengari rayat di sitak Kunsil Nengeri (DUN) Batang Ai enggau Kaban Parlimen Lubok Antu mantu mutarka penanggul tanah tusur ke ngelamun ujung bilik rumah panjai sida.
Tuai Rumah Unsa Bakar madahka, bantu baka kobi, pengelabak tauka excavator beguna bendar ungkup sida serumah ke dituntung penusah tanah tusur nya laban tanah ke betugung ba belakang rumah sida nya chukup mayuh.
“Aku tu ngarika rayat aku di Sekandis ditu, minta saup kita pengari rayat YB, MP sereta kita ke bekaul ba N.34 enggau P. 203 Lubok Antu patut lengkas ngesah penusah kami.
“Diatu rumah kami tu udah kena duju tanah tusur lalu masuk ke bilik kami nadai chara bukai muai tanah tu enda ulih skop ngena changkul.
“Kami begunaka lipan tauka kobi ngali muai tanah tu. Arapka kita anang nganti ila nganti lusa,”ku iya.
Iya bejaku munyi nya nengah siti video ke dianjung iya ngagai TVS, kemari.
Ku iya, arapka raban ke bekaul bisi ninga sebana sida serumah lalu anang betangguh mutarka penanggul nya.
Bekau ari penyadi tanah tusur tu, bisi lima pintu dapur bilik sida serumah kena tuju tanah tusur ngujungka dinding pechah sereta lutak nyau tama ke dalam bilik.-TVS
