BINTULU, 13 Okt: Indu Opis Polis Pelilih (IPD) Bintulu mujur nangkap enam iku saspek dalam timpuh kurang ari 24 jam bekaul kes nikau bom api enggau kereban tunu ke dalam rumah siku pedagang di mengeri nya.
Beduduk enggau nya, Tuai Polis Pelilih Bintulu, Superintendan Nixon Joshua Ali ngamatka senentang video ti dikerembaika ba laman media rama satu minit 33 sikin nya nyadi di Bintulu.
Ku iya madah, pansik silik bekaul rikod kamera CCTV nya ngayanka tiga iku lelaki ngena gari chelum pansut ari kerita seraya nikau utai ke dalam sebuah rumah ti ngujungka munyi meletup enggau bisi pansut api.
“Berindik ari penusah nya, seraban polis ari Begian Tasat Jenayah, IPD Bintulu udah ngelancharka operasi khas ti betuju nyidi enggau ngiga semua saspek,” ku iya.
Iya nerangka, pengudah nerima penerang senentang penusah nya urung pukul 4.11 minit lemai Hari Enam, enam iku saspek ditangkap dalam timpuh kurang ari 24 jam sereta ngerampas kerita, sekeda telefon binching sereta gari saspek dikena mantu pengawa nasat.
Ku iya madah, nitihka rikod penyalah sebedau tu, saspek bisi 15 kes mayuh macham kes jenayah nyengkaum salah guna dadah.
“Kesemua saspek deka direman enggau ditasat ba baruh seksyen 435 kanun keseksaan ungkup tasat silik,” ku iya.
Nya alai, Nixon nangkan mensia mayuh ngambika enda ngaga spekulasyen tauka nampung berita sengapa ti tau meri penyaru ngagai orang bukai.
Tandu iya, polis enda belembut ati sereta deka ninggang ukum ke patut ngagai orang tauka raban ti ditemu nguji ngereja penyalah ti negu isu sensitif.
Mensia mayuh ti bisi penerang bekaul penusah nya ulih datai ke balai tauka betelefon ngagai Pegawai Penasat, Inspektor Lai Mei Ching ba lumur 014-8763824 tauka bilik gerakan IPD Bintulu ba lumur 086-318304.-TVS
