KUCHING, 13 Okt: Rayat patut meretika agenda pemansang enggau semua inisiatif ti benung dipejalaika Premier Sarawak, Datuk Patinggi Tan Sri Abang Johari Tun Openg dalam nempa Sarawak nyadi sebuah wilayah maju enggau bepenatai pemisi tinggi manggai taun 2030.
Tuai Sekretari Politik ngagai Premier Sarawak, Dato Fazzrudin Abdul Rahman madahka, sukung penuh ari rayat beguna amat ngambika ulih ngasaika empas ari agenda pemansang ti dipejalaika perintah.
Ku iya, siti ari chara pemadu manah dalam nyukung pengawa perintah iya nya ngetanka penyerakup pupu bansa ngambika semua pengawa ti dipejalaika terus
“Kadang-kadang lebuh kitai enda mereti kitai ngasaika tusah tang lebuh kitai nemu nama empas nya ngagai kitai empu nyadi dia kitai ulih nyukung pengawa ti dipejalaika Premier Sarawak. Mudah aja chara kitai nyukung dikena nentuka penyerakup tu iya nya kitai patut ngetanka iya.
“Dikena nentuka chara kereja kitai ulih ngenataika asil, kitai patut ngetanka nya. Anang kitai ngachau kereja ti udah manah ke meri asil. Kitai neruska meri sukung dikena nentuka pemujur ulih dijapai nengah chara nya,” ku iya.
Iya mansutka jaku nya rambau pengerami bejadika Program Jiwa Komuniti Madani DUN N6 Tupong di Diwan Mayuhguna Kampung Paroh ditu sehari tu tadi.
Tandu iya, nyema penyerakup enda dijaga manah ti ngujungka bepechah, nya semina mai pengerugi ngagai semua pupu bansa lebih agi ngagai rebak dudi.
Berebak enggau nya, Dato Fazzrudin Abdul Rahman ke mega Kaban Kunsil Nengeri (ADUN) sitak Tupong meri jamin geran niting taun ungkup komuniti madani tu deka diberi dikena bejalaika program-program ti udah diperambu.
Ku iya, kerejasama rat entara Komiti Pemansang enggau Pengelikun Genturung Pendiau (JKKK) enggau ranting Parti Pesaka Bumiputera Bersatu (PBB) patut ditegapka dikena ngemujurka program sereta nyeliahka aktiviti ke sama belama diatur ba siti-siti sitak.
“Ngarap ari dulu suba, entara nya Komuniti Satu Malaysia Komuniti Best Study lalu diatu Komuniti Madani, kitai deka meri geran ninting tun ngagai semua komuniti ke diau ba sitak N6 Tupong dikena sida bejalaika program. Taja pia, pesan aku semina bekereja rat enggau JKKK seret ranting ngambika program ti dipejalaika ulih optimumka,” ku iya.
Tiga komuniti MADANI ti udah ditumbuhka ba sitak dewan DUN Tupong iya nya Komuniti Madani Kampung Gita Lama, Komuniti Madani Kampung Kolong Dua, enggau Komuniti Madani Kampong Paroh.-TVS
