MIRI, 13 Okt: Lapan pintu pengani ke tebunsa lenyau rumah ketegal penusah angus ba Taman Ceria Bandar Baru Permyjaya udah nerima bantu barang guna ninting hari.
Menteri Pengangkut Sarawak, Dato Sri Lee Kim Shin mega minta Opis Pengintu Pengelantang Komuniti datai mantu anak ke tasah penusah angus tu lebih sida ti agi besekula.
“Udah tentu pemakai bantu lengkas dikena ngelempungka tating sida enggau ungkup anak sida ti agi besekula baka baju uniform sekula. Tu semua deka diatur baka selama bantu lengkas diberi,” ku iya.
Iya mansutka jaku nya rambau ngabas raban penusah angus di Taman Ceria Bandar Baru Permyjaya ditu, pagi tadi.
Berebak enggau nya, iya minta Opis Bomba enggau Penyah Penusah Malaysia (JBPM) bejalaika tasat silik dikena ngelala kebuah penusah angus nyadi.
“Nyadi aku madah ngagai bomba ditu ngambi bejalaika tasat penuh kebuah penusah angus. pia mega enggau raban forensik ti deka datai enggau bejalaika tasat pasal pekara tu.Udah tentu baka selama ngelalau pengani sida mesti bejejimat, ” ku iya.
Nangkan ke nya, raban dituntung penusah angus tu mega dipinta betanya terus ngagai Opis Pemansang Pengawa Berumah (HDC) bekaul enggau insurans enggau rumah ti agi benung insuran bayar.
Kena lemai Hari Enam, bisi lapan unit rumah flat dua ringat di Taman Ceria Bandar Baru Permyjaya dituntung penusah angus.
Komander Operasyen Mohammad Faizul Ali madahka, raban iya nerima ripot pasal penusah nya urung pukul 3.05 lemai Hari Enam lalu ngerah 18 iku raban ari Balai Bomba enggau Penyah Penusah (BBP) Lutong sereta dibantu BBP Lopeng. -TVS
