KUCHING, 12 Okt: Bini Tuai Pemegai Menua Nengeri (TYT) Sarawak, Toh Puan Fauziah Mohd Sanusi nyadi penerima keterubah ari 1,046 iku penerima pangkat basa beserimbai enggau Pengerami Ngintu Hari Pengada Tuai Pemegai Menua Nengeri (TYT) Sarawak, Tun Pehin Sri Dr Wan Junaidi Tuanku Jaafar sehari tu.
Toh Puan Fauziah nerima pangkat Darjah Utama Yang Amat Mulia Bintang Kenyalang (DP) ti mai gelar Datuk Patinggi.
Sama bisi nerima pangkat DP iya nya Chairman Yayasan Tun Jugah Tan Sri Leonard Linggi Jugah.
Tuai Akim Menua Sabah enggau Sarawak Tan Sri Abdul Rahman Sebli diberi pangkat Darjah Panglima Negara Bintang Sarawak (PNBS) ti mai gelar Dato Sri.
Penerima ke bukai iya nya Tuai Komuniti Melayu Sibu, Temenggong Datuk Wan Hamid Edruce Tuanku Mohammad, Luyar Besai Sarawak Datuk Saferi Ali enggau Sapit Sekretari Perintah Sarawak Datuk Dr Muhammad Abdullah Zaidel.
Sapit Menteri Pengeraja Asal enggau Pemeruan Rampa Menua Datuk Seri Huang Tiong Sii, Sekretari Peribit Kanan Premier Sarawak Datuk Khir Busrah enggau Tuai Pemesai Eksekutif Kaunsil Pemansang Koridor Wilayah (RECODA) Datuk Ismawi nerima Darjah Panglima Gemilang Bintang (PGBK) ti megai gelar Dato.
Direktor Unit Protokol, Adat enggau Pengatur Pengerami Sarawak Hamdan Sharbini sereta Dekan Fakulti Sains Sosial enggau Kemanusiaan Universiti Malaysia Sarawak (UNIMAS) Prof Dr Neilson Ilan Mersat entara 12 penerima Darjah Jasa Bakti Sarawak (DJBS) ti mai gelar Datu.
Bisi 18 iku nerima Darjah Panglima Bintang Setia Sarawak (PSBS) ti mai gelar Datuk, nyengkaum Tuai Sekretari Politik Premier Sarawak Fazzrudin Abdul Rahman, Datuk Bandar Kuching Utara Hilmy Othman enggau Sekretari ngagai Premier Sarawak Ambrose Cheng Loi Hee.
Kelimpah ari nya, bisi tiga iku nerima Johan Bintang Sarawak (JBS), siku nerima Johan Bintang Kenyalang (JBK), 20 iku nerima Pingat Perkhidmatan Cemerlang (PPC), 15 iku nerima Pegawai Bintang Sarawak (PBS) ditangkan 98 iku nerima Pegawai Bintang Kenyalang ( PBK).
Bisi 143 iku diberi Pingat Perkhidmatan Bakti,Ahli Bintang Sarawak (76), Ahli Bintang Kenyalang (198), Pingat Perkhidmatan Terpuji (194) sereta Ahli Bintang Kenyalang (259). – TVS
