ENGKILILI, 12 Okt: Bemacham projek pemansang benung chakah dipejalaika di sitak Kunsil Nengeri (DUN) Engkilili sekalika nya ari Perintah Besai tauka Perintah Nengeri.
ADUN iya Dr Johnical Rayong Ngipa madah, tebal agi projek nya dipejalaika nengah aguh dibaruh Projek Transformasyen Menua Pesisir (RTP) enggau Projek Ngemanah Rumah Seranta Sarawak (PPRMS).
“Projek pemansang diatu benung chakah diatur sekalika nya ari perintah besai, tauka perintah nengeri lebih agi projek-projek jalai ba sitak Ulu Skrang.
“Kedua bisi udah ditinda, iya ke dalam proses tinda bisi nya (beungkus) bejuta ringgit…Tu nyengkaum RTP DUN Engkilili ke udah dikemendarka Yang Amat Berhormat Premier Sarawak.
“Terima Kasih ngagai iya (Premier) laban chukup siru dalam timpuh tiga minggu tu urung RM2.5 juta (udah dikemendar).
“Kelimpah ari nya iya mega bisi ngemendarka agih belanja dikena ngemanah rumah rayat seranta ke beungkus RM500, 000 lalu tu deka disambung taun baru nyadi aku andal tu deka dipejalaika enggau naka pengelengkas,” ku iya.
Dr Johnical mansutka pekara nya maya dirandau TVS pengudah tembu Program Jiwa Komuniti Madani Renggat DUN N.33 Engkilili diatur Opis Pemadah (JAPEN) Sri Aman ba Dewan Dr Johnical Rayong Ngipa, Skim Skrang kemari.
Ku iya, nengah randau iya begulai enggau Direktor Unit Perambu Ekonomi (EPU) Sarawak Datu Lester Mathew, apin lama ke udah beratika semua peminta rayat ungkup projek ngemanah perengkaguna rumah panjai ba sitak DUN Engkilili mayuh udah dikemendarka.
Nya alai, iya andal semua projek pemansang di DUN nya deka terus bejalai enggau mujur.-TVS
