KUCHING, 12 Okt: Komitmen Sarawak dalam ngemunaska penyeranta di wilayah tu ulih dipeda nengah polisi ekonomi bepelasarka Strategi Pemansang Pasca Covid-19 (PCDS) 2030.
Premier Sarawak Datuk Patinggi Tan Sri Abang Johari Tun Openg madahka PCDS 2030 nyata ulih nyungkak ekonomi Sarawak ngagai tikas ke tinggi enti dibanding 10 taun ke udah.
Ku iya, perintah Sarawak meri kelala pasal polisi enggau inisiatif ti ngemeratka inovasyen teknologi sereta industri ti ngembuan rega tambah ti tinggi kelimpah ari ngambi chara strategik dikena ngemansangka aset strategik.
“Empai lama, Sarawak udah nyadi pemegai saham pemadu besai dalam Bank Affin penyampau 31.25%.
“Inisiatif tu ukai semina ulih ngenegapka Sarawak dalam sektor pekara wang tang mega ulih mantu nyungkak ekonomi nengeri nengah bemacham pelasar fasiliti pekara wang, kelebih agi ungkup pemansang industri mit enggau jelan pemesai,” ku iya.
Iya madah munyi nya lebuh bejaku ba pengawa bebaris nyerumba Pengerami Nyambut Hari Pengada Tuai Pemegai Menua Nengeri (TYT) Sarawak ke-78 di Padang Merdeka, pagi tadi.
Udah nya ku iya, inisiatif ngemayuhka ekonomi ukai semina deka ngenegapka ekonomi sarawak tang mega ulih mantu wilayah tu napi pemar dunya.
“Kelimpah ari nya, pengawa ngambi Bintulu Port ari Perintah Sarawak nyadi pemujur ti strategik. Pengawa tu nentuka kuasa penuh ba palan penyangkai kapal tu ti nyadi puncha ekonomi Sarawak, kelebih agi dalam pengawa dagang enggau eksport barang komoditi,” ku iya.
Berebak enggau nya, Abang Johari ngarapka pengawa servis kapal ba Palan Penyangkai Kapal Bintulu deka nambah nengah pengawa ngelancharka Borneo Supply Base ti dipejalaika Kaunsil Penyangkai Kapal Bintulu.
Ku terang iya, pengawa nyiri kompeni minyak ti diempu Sarawak, Petroleum Sarawak Berhad (PETROS) ungkup aggregator gis ulih ngenegapka ekonomi sarawak sereta nambahka penatai pemisi ruang bilik ngagai tikas tinggi enti dibandingka enggau tikas nasional.
Strategi ngemayuhka ekonomi ti dipejalaika ngena teknologi ari ekonomi bepelasarka betanam betupi enggau komoditi dipeda ulih meri penguntung seraya bank dunya udah ngaku Sarawak nyadi nengeri bepenatai pemisi tinggi ba taun 2022 enggau 2023. -TVS
