KUCHING, 12 Okt: Ejensi Pemansang Ulu Rajang (URDA) udah mujur nembuka urung 13 projek infrastruktur besai ba sekeda pelilih baka di Song, Kapit, Bukit Mabong, enggau Belaga, ti nyadi kelai pengeransing perintah ke terus bebendar ngemansangka menua Ulu di Sarawak.
Chairman URDA, Datuk Seri Alexander Nanta Linggi madahka, 13 projek nya sebagi ari 43 kesemua projek ti benung dipejalaika ngena agih penyampau RM1.5 bilion ke diberi perintah Sarawak ngagai ejensi pemansang nya.
“Diatu kami ba ditu bisi 43 projek Infra ti mayuh ngaul projek jalai ba endur URDA ke mungkur pelilih Song, Kapit, Bukit Mabong enggau Belaga.
“Sekeda ari projek tu udah tembu digaga, bisi sekeda benung bejalai sereta 13 udah tembu,” ku iya.
Iya ke nyadi Kaban Parlimen Kapit mansutka jaku nya nengah aum media sepengudah bechairman Aum Kaunsil URDA Ke-6 ba Ringkat 8, Menara Balai Dagang enggau Industri Dayak (DCCI) kemari.
Beduduk ari nya, Nanta ke nyadi Menteri Kereja Raya ngarapka, turu tambah RM1.5 bilion dikena neruska mayuh bengkah projek pemansang infrastruktur enggau sosioekonomi di kandang endur URDA.
“Udah tu, kami ngarapka bisi turu tambah diberi kurang lebih  RM1.5 Bilion. Kami udah ngelala ni bagi projek ti patut dikemansangka ba pelilih tu, nyengkaum agi mayuh projek infra baka jalai deka digaga. Pia mega, serak tu aku meda bisi deka ngemansangka sosioekonomi,” ku iya.
Ku iya madah, projek baka nya endang beguna amat laban ulih nyendiaka akses lebih manah ngagai perayat di menua ulu, seraya ngemudahka sida besambung enggau mengeri sereta kandang endur bukai di wilayah tu.
Tandu iya, URDA mega bekerejasama enggau mayuh macham ejensi luar bukai dikena belajar chara pemansang sosioekonomi ti lebih engkeman ari Semenanjung Malaysia.-TVS
