KUCHING, 11 Okt: Premier Sarawak Datuk Patinggi Tan Sri Abang Johari Tun Openg madahka ulah makai suap ulih ngeruga pemansang menua enggau pengelantang komuniti enti enda diputarka enggau manah.
Ku iya madah, tu siti pekara ke enda beintegriti bepun ari ulah mensia ke kelalu amu.
“Dudi hari menua kitai bepanggai ngagai penyauh ni kitai ulih mutarka makai suap sechara efisyen baka penyakit riman ti ngerusak tubuh kitai sechara diau.
“Makai suap ngekai dalam sistem enggau ngeruga dudi hari rakyat Malaysia.
“Ungkup pemaik sekeda raban ke amu, makai suap ngerusak integriti menua, ngeruntuhka pengandal rayat ngagai perintah enggau numbuhka gaya sosial ke enda adil ti ulih meri empas enda manah ngagai ekonomi,” ku iya.
Abang Johari mansutka pekara nya rambau Program Pesan Perdana Integriti (MAP-i) 2024’ di Dewan Kompleks Islam Kuching,ditu kemari.
Ku Abang Johari madah, dikena nagang makai suap, perintah bemalinka konsep madani ti bepelasarka ulah ti meruan, pengelantang, inovasi, bebasa ke orang bukai enggau pengasih.
Iring tuai dalam sektor rama enggau peribit mesti mandangka ulah ke manah dikena nentuka rayat terus andal ati.
“Keliling enda bebatak asur ngagai ulah makai suap mesti ditumbuhka enggau mesti ditegapka lalu nadai kompromi dipejalaika.” ku iya.
