ENGKILILI, 11 Okt : Pengani Rumah Panjai Unsa, Sekandis Lemanak enggau Rumah Panjang Alexander di Sekandis Baruh Lemanak di sitak Kunsil Nengeri (DUN) Batang Ai ditu begau ketegal dituntung penusah tanah tusur pagi tadi.
Tuai Balai Bomba enggau Penyah Penusah (BBP) Betong, PPgB Vincent Baling Yabi madah dirandau madah, raban sida berumban ngesah palan penusah pengudah nerima kangau ari mensia mayuh.
Datai ba endur penusah nyadi sida tepedaka dinding dapur lima pintu pengani Rumah Panjai Unsa enggau dinding ruai tiga pintu pengani Rumah Panjai Alexander runtuh dituju tanah tusur.
“Raban bomba bisi nerima kangau ngagai balai pasal penusah lalu berumbah ngesah palan penusah.
“Seninjik datai ba palan penusah kami meda dinding dapur lima pintu pengani Rumah Panjai Unsa udah runtuh.
“Pia mega ruai tiga pintu pengani Rumah Panjai Alexander bela dituntung penusah ke sama,” ku iya.
Ku iya, naka ripot nya digaga nadai sebarang penusah bebadi nyawa diripotka lalu iya terus nangkan mensia mayuh bela bejejaga bekau gaya hari ke benung ujan.
“Nyadi sida ke diau semak sungai enggau mudah kena tuntung penusah ampuh bah dilalau bejimat lalu anang laun madah ngagai raban bomba ungkup atur ke patut,” ku iya.
Nangkan ke nya, sebuah rumah nyembuah ke diuan empat iku pengani ba Rumah Panjai Unsa kena ampuh bah sereta semina dipeda perabung.
Sida ke nguan rumah nya dipadahka udah mindah ngenduh ngagai rumah bala kaban belayan rumah panjai.
Ke penerang, Rumah Panjai Unsa diuan urung 76 iku pengani lalu Rumah Panjai Alexander bisi 15 iku.-TVS.
