ENGKILILI, 11 Okt: Komuniti di menua pesisir lebih agi bala Tuai Raban Bansa enggau Tuai Rumah (KMKK) ba sitak Kunsil Nengeri (DUN) Engkilili diperansang patut regas ngulu program ke diatur perintah ngambika tau nambahka penemu enggau nemu bagi penerang penerang pemadu baru senentang atur perintah.
Kaban Kunsil Nengeri (ADUN) Engkilili Dr Johnical Rayong Ngipa madah, KMKK anang lembau ngulu program ke diatur perintah ba menua diri laban nya sebagi ari atur perintah ngambika sida nemu chara ngemansangka rumah panjai.
“Kitai di menua pesisir mesti deka nemu baka ni deka ngemansangka rumah panjai sekali nya chara lama suba tauka chara baru.
“Nyadi anang enda chakah ngemansangka menua diri, laban enti enda teaturka menua dia kitai ke tuai baka tuai-tuai rumah, Penghulu tauka Kaunselor kita deka kena anu nembiak redak.
“Chunto sida deka nanya, nama enggi orang bukai bisi (pemansang) tang enggi kitai nadai.
“Nya kebuah, kita (KMKK) mesti regas tauka aktif ngulu semua program diatur perintah dikena ngulihka penemu tauka penerang ke baru,” ku iya.
Iya mansutka pekara nya maya Program Jiwa Komuniti Madani Renggat DUN N.33 Engkilili diatur Opis Pemadah (JAPEN) Sri Aman bepalan ba Dewan Dr Johnical Rayong Ngipa, Skim Skrang pagi tadi.
Ku iya, diatu bemacham inisiatif bisi diatur perintah Sarawak patut direbut komuniti menua pesisir dikena nyungkak sosio ekonomi diri empu.
Nya alai, ku iya rayat enda tau enda nguji nguna teknologi moden kelimpah anang mudah tekuing runding enggau sebarang penerang ke enda betul di media rama.
Program sehari nya bela digembar enggau licha dikenataika Dr Mirunaali Selvaraju enggau Shazwani Sarkawi ari Opis Pengerai enggau Opis Wang Turu Pengereja Pengawa Sri Aman.
Sama bisi datai Pegawai Pengatur Pengawa Opis Pelilih Engkilili, Brin Munsang, Penulung Pegawai JAPEN Sri Aman, Jesseca Gilbert Bunsu enggau ke bukai.-TVS
