SIBU, 7 Okt: Menteri Pelajar, Inovasyen enggau Pemansang Bakat Sarawak Dato Sri Roland Sagah Wee Inn madah diri berasai asa meda pemutus dikangau intebiu ungkup Pengawa Ngambi Khas Pengajar Sarawak 2024.
Ku iya, Komisyen Servis Pelajar (SPP) nyau baka enda ngamatka semaya ti lebih ngemeratka peluang nya diberi ngagai bala anak Sarawak, laban ba pemutus intebiu nyau dipeda lain.
“Tu enti nitih peluang ungkup anak Sarawak aja.
“Tang diatu, sida madah sida mega deka intebiu chalun ari wilayah bukai di Malaysia.
“Udah tentu kuasa ba jari sida, kuasa bepanggai ngagai Komisyen Servis Pelajar (SPP).
“Kami nadai ngembuan hak deka bejaku pasal nya, tang aku ngasai baka sida nadai ngemataka semaya,” ku iya.
Roland Sagah mansutka jaku nya maya Aum Media Isu Pengawa Ngambi Pengajar Khas ba Sarawak ditu, sehari tu tadi.
Tandu iya, taja Sarawak nadai nagang deka intebiu chalun ari nengeri bukai, tang manah agi nya diatur ba maya bukai.
Roland Sagah mega ningkah isu dikemegau ba media rama madahka lebih mayuh peranak ari nengeri bukai dirintai pandak ungkup intebiu dibaruh inisiatif nya laban data pasal pekara nya bedau diterima.
Taja pia, ungkup peminta ke ngembuan degree dalam bidang pelajar, urung 300 chalun ke dirintai iya nya chalun ukai ari Sarawak
Sagah madah SPP patut konsisten enggau lebih nemu anang guai muka peminta ngagai semua rayat laban mayuh peminta ari wilayah tu deka asa lalu pekara nya enda adil.
Inisiatif nya udah nerima lebih 15,000 peminta lalu semina 6,000 udah dirintai pandak dikangau intebiu ke deka diatur ba Kuching, Sibu enggau Miri.-TVS
