SARATOK, 7 Okt: Kaban Kunsil Nengeri (ADUN) Krian Friday Belik muji inisiatf Opis Pelilih Saratok (MDS) ke udah ngatur Pekit Rumah Panjai Beresi enggau Genturung Pendiau Manah di pelilih menua nya.
Ku Friday, pekit nya chukup manah laban seriris enggau Strategi Pemansang Pasca Covid-19 (PCDS) 2030 Sarawak ti keran meda menua pesisir ke lantang, inklusif, meruan sereta maju manggai taun 2030.
“Program tu ngembuan reti enggau tuju ke chukup manah lebih agi laban iya ngaul komuniti menua pesisir baka genturung pendiau enggau rumah panjai sama ngambi bagi.
“Tuju aktiviti baka tu awak sida terus segulai sejalai dalam sebarang aja program enggau aktiviti ke diatur sebarang ejensi perintah lebih agi Opis Pelilih,” ku iya.
Friday mansutka jaku nya rambau Pengerami Nutup enggau Nyuaka Perais ngagai pemenang Pekit Rumah Panjai Beresi enggau Genturung Pendiau Manah diatur Opis Pelilih Saratok (MDS) di Dewan Sri Krian Saratok ditu, pagi tadi.
Nitihka penerang, pekit ke berengkah 9 nyentuk 17 September tu tadi udah dipasuk 14 buah rumah panjai enggau semilan buah genturung pendiau di DUN Krian enggau DUN Kalaka .
Ungkup pemenang Kategori Rumah Panjai ngemataka Rumah Panjai Jamu Akang, Peligong Sebetan dipadu nyadi champion ditangkan lumur dua, Rumah Panjai Ikom Senyawan enggau Rumah Panjai Ajong Tembawai Pok bulih penuduk lumur tiga.
Udah nya, pemenang Kategori Genturung Pendiau ngemataka gelar champion dipenggi Kampung Tengah Perpat sereta lumur dua enggau tiga fiempu Kampung Hulu Perpat enggau Kampung Lot Wawasan Kampung Melango Lama.-TVS
