SIBU, 7 Okt: Premier Sarawak Datuk Patinggi Tan Sri Abang Johari Tun Openg mantaika ‘ulu lungga’ senentang penatai pemisi nengeri engka deka ngelui RM13.1 bilion, penyampau asil ti dirikodka ba taun nyin kemari.
Pekara nya, ku iya, deka dipadahka dalam jurai Bajet Sarawak 2025 ba bulan baru.
“Bulan baru iya nya Bajet Sarawak, taun nyin kemari kitai bulih penatai pemisi RM13.1 bilion, engka taun tu lebih ari nya (penatai pemisi 2023).”
“Enggau nya, kitai deka mulaika baru ngagai rayat dikena munaska penyeranta nengah pelajar,” ku iya.
Iya bejaku munyi nya rambau Pengerami Bejadika Konvensyen Nembiak Parti Pesaka Bumiputera Besatu (PBB) ditu, kemari.
Sebedau tu, Sapit Premier Sarawak ke Mega Menteri Pekara Wang enggau Ekonomi baru kedua, madahka naka bulan Jun tu tadi, penatai pemisi Sarawak udah manggai RM7.66 bilion, ke mandangka ekonomi nengeri tu ba gaya ti positif.
Penuduk Sarawak ti nyadi wilayah bepenatai pemisi tinggi di Malaysia dipechaya deka terus tegap dalam timpuh panjai berindik ari pemansang ekonomi ti manah.-TVS
