SIBU, 7 Okt: Parti Pesaka Bumiputera Besatu (PBB) deka terus komited nempa enggau ngelatih raban nembiak nyadi ketuai nyadika penabat dudi hari.
Presiden PBB, Datuk Patinggi Tan Sri Abang Johari Tun Openg madahka pengawa meri latih ngagai raban tuai patut dipunka ari renggat baruh dikena nyikap raban nya enggau penemu sereta peneleba dalam politik.
“Nyadi kitai dalam PBB patut nempa rebak baru ti ulih nyadi tuai dudi hari.
“Kelimpah ari nya, sida ulih nguna teknologi enggau puncha kitai ke pemaik.
“Enti bisi puncha tang chara ngiring enda betul, enda ulih mega, mesti dua-dua.
“Tu mih kebuah kami dalam PBB deka ngelatih rebak baru tu ngambika sida ngembuan chara ke betul dalam politik,” ku iya.
Abang Johari mansutka jaku nya rambau aum media pengudah bejadika Konvensyen Raban Nembiak PBB ditu, kemari.
Kelimpah politik, iya nerangka, rebak baru patut ditegapka enggau pengelandik dalam teknologi enggau ekonomi.
“Politik semina siti pantar dikena kitai meri servis, mayuh mega ke bukai ti ukai politik tang ari pengelandik diri empu ti ulih nyungkak ekonomi kitai.
“Enti dua pekara nya sama, lalu ti ketiga iya nya teknologi sereta puncha ulih diserariska kitai enggau diatur kitai ngena chara ti betul.
“Nyadi sehari tu iya nya siti hari sejarah ke alai raban PBB, tuai PBB nerima raban nembiak.
“Kami ngarap raban nembiak tu, program nya baka internship dalam sebuah ejensi korporat sereta internship tu, sida kebendar iya belajar, ngambika ulih mantu ngangkatka pengidup (rayat) dudi hari,”ku iya.-TVS
