SARATOK, 7 Okt: Industri dagang temuai bepelasarka Inap Desa di sitak Kunsil Nengeri (DUN) Krian deka terus ditegap nengah kerejasama Opis Menteri Dagang Temuai, Seni enggau Main Asal (MOTAC).
Kaban Kunsil Nengeri (ADUN) Krian Friday Belik madah, ungkup pemungkal bisi 20 buah rumah panjai ba DUN Krian udah dipilih nyadi pengerandang program nya ungkup taun tu.
“Aku udah nyebut tadi tu endang atur keterubah kitai ti deka ngelakuka endur rumah panjai enggau menua pesisir ngagai bala temuai.
“Tu endang pekara baru nyangka bisi penanggi ba komuniti kitai lebih agi ba rumah panjai.
“Nya alai tuju kitai deka ngelakuka inap desa tauka dikumbai ‘homestay’ ngagai sida (temuai) tu mih,” ku iya.
Iya mansutka jaku nya maya dirandau pengudah ngulu Pengerami Nutup enggau Nyuaka Perais ngagai Pekit Pemeresi enggau Pemanah Rumah Panjai Enggau Genturung Pendiau 2024 diatur Opis Pelilih Saratok (MDS) di Dewan Sri Krian Saratok ditu, pagi tadi.
Friday mega ngarapka industri dagang temuai bepelasarka inap desa di Saratok deka terus ngerembai ngambika ulih matak mayuh temuai datai ke menua nya.-TVS
