SIBU, 7 Okt: Chalun nembiak ulih diperundingka ungkup bediri minta pilih dalam pengawa bepilih nyema sida udah tetangkupka penetap ti udah ditetapka.
Premier Sarawak ke mega Presiden Parti Pesaka Bumiputera Besatu (PBB) Datuk Patinggi Tan Sri Abang Johari Tun Openg madahka udah nyadi tradisyen parti nya nganjung chalun lama enggau baru ninting kali pengawa bepilih diatur.
“Ukai ulih terus bepekit, aku suba pan nganti mega bepekit senentang bepekit tu. Keterubah iya mesti bisi pengelandik, kedua ulih diterima laban tu nyengkaum sosiobudaya enggau enti tu ulih dititihka, enda kira asal penatai, enda kira dini alai enti komuniti nerima.
“Nya alai kitai ulih nganjung sida nyadi chalun tang kitai deka bisi champur orang biak laban dalam PBB, kitai mesti bisi 30 peratus mua baru tetiap kali pengawa bepilih diatur. Nyadi, 30 peratus mesti bisi mua baru, nyadi mua baru enggau mua lama, ” ku iya.
Iya bejaku munyi nya rambau aum media pengudah bejadika Konvensyen Raban Nembiak PBB Di Sibu, Hari Minggu tu tadi.
Tandu Abang Johari, raban tuai biak patut dilatih dikena nambahka peneleba enggau penteba ke betul nyadi tuai ti kompeten sereta meretika aspirasyen rayat pupu bansa.
“Peneleba iya dalam siti perau ke udah dilatih kitai enggau kitai nemu sida biak tu kekadang kelalu jampat, enti perau nya jampat, sida enda nemu ba mua bisi pun kayu, ulih engkejuk.
“Nyadi maya biak tu taja pan jampat tang awakka jampat enggau chara ke betul, ke alai enti bisi uras, enti uras nya mayuh, utai bepusin nya patah,nnyadi sida mesti nemu baka ni ngatur pekara nya, laban agi biak tang sida mesti bisi penyabar,” ku iya.
Ku terang iya, tuai raban nembiak patut bisi penyabar ke tinggi sereta ngembuan integriti ke tegap dalam bejalaika sesebengkah pekara.
“Laban kita mesti belajar, lalu pengudah kitai enggau pengawa bepilih, kita mesti besedia penuh berandau enggau orang seranta, sedang enggau bansa sereta jalai pengarap ke bukai.
“Kitai enggai orang ti ekstrim laban dikena ngulih sukung, kitai bemain enggau pengarap, nya ulih meri penanggul tang kitai dalam komuniti kitai ti ngembuan pupu bansa, nyadi kitai mesti nyemelaka semua pemegai taruh enggau utai ke patut iya nya nengeri kitai likun,” ku iya.-TVS
