SARATOK, 6 Okt: Penyerakup sereta sukung antara apai indai enggau pengajar dipeda ulih nyadi kunchi ngagai pemansang enggau pemujur ba sekula.
Kaban Kunsil Nengeri (ADUN) Krian Friday Belik madah, pemujur sesebengkah sekula tusah dijapai enti nadai pengeransing, kerejasama enggau sukung ari bala apai indai enggau pengajar.
“Bakani chara kitai nulung sekula tu tadi, kelimpah ari mantu ngena belanja kitai mega meruan meri peransang sukung ngagai guna pemansang ba sekula tu.
“Kitai mega deka beratika pemujur bala anak kitai ke besekula dia, kitai mesti sama kiruh nemu pekara pemansang pelajar sida,” ku iya.
Iya madah munyi nya maya bejaku ba Pengerami Segulai Sejalai diatur PIBG Sekula Sekondari (SMK) Saratok 2024 ba Dewan Serbaguna SJKC Myn Syn Saratok, kemari.
Ku iya, pengulih apai indai dalam mantu nyungkak rikod sekula dalam bemacham bidang baka akademik, kokurikulum, pemansang fizikal enggau pengawa nempa modal mensia endang ditagih dikena napi jeman globalisasyen kemaya hari.
Tandu iya laban ke nyadi pengari rayat iya mega deka naka ulih mantu raban sekula ari segi belanja dikena nentuka SMK Saratok terus nyulut dudi hari.
Ke penerang, sepenyampau RM80, 000 agih belanja udah disuaka Friday ngagai SMK Saratok dikena ngatur aktiviti ke bekaul enggau sekula nya.
Sama bisi datai Prinsipal SMK Saratok, Beritin Empawi enggau Yang Dipebasa PIBG SMK Saratok Spencer Gon.-TVS
