SARIKEI, 6 Okt: Loji Ai Beresi Bayong dipelaba dibuka penuh ujung taun tu, ku Dato Sri Julaihi Narawi.
Menteri Utiliti enggau Telekomunikasyen Sarawak nya madah, loji nya ulih nyendiaka 100 juta liter ai (MLD) sehari ungkup selampur menua di Sarikei, enti pengawa ngemanah loji nya ila udah tembu.
Ku terang Julaihi, enti loji nya ila udah tembu, iya deka ngemanah agi sistem bekal ai ke udah bisi diatu ba Sarikei nyengkaum Tanjung Manis, Belawai sereta Pulau Bruit.
“Tis enggau pengaku deka dipejalaika ba bulan November, lalu reti nya loji ketiga ke beungkus RM68.8 juta ngena bajet Sarawak empu.
“Nengah kapasiti 30 juta liter sehari, deka ulih dibuka pengudah pengawa ngetis enggau ngaku nya tembu ba bulan November ila.
“Ari perati semua loji tu enti udah dibuka ila, ulih nyendiaka ai enggau sitak ke besemak,” ku iya.
Berebak enggau nya, Julaihi mega madahka projek julau pakej satu beungkus RM25.68 juta deka ngemanah sistem bekal ai ke udah bisi ba pasar Julau, Sitak Sungai Manok, Nanga Luau, Sekula Sekondari (SMK) Julau No 2, enggau Sungai Jikang.
Ku iya, lima projek beungkur urung RM236 juta diatu ba renggat perambu lalu projek julau lumpar kedua dipelaba ditinder ba suku keterubah taun 2025, udah nya, dua agi projek benung ba renggat nyiri konsultan.
Semua projek nya ku iya endang sebagi ari sistem grid bekal ai Sarawak datai ari buah penemu Premier Sarawak dalam mutarka isu bekal ai sechara efektif enggau mungkur semua endur.-TVS
