KUCHING, 6 Okt: Entua indu Menteri Kereja Raya Datuk Seri Alexander Nanta Linggi Puan Sri Elizabeth Pawa, 76, udah nadai ba rumah iya empu ditu pukul 9.55 pagi tadi.
Nanta mantaika berita sinu nya nengah sebengkah penerang ba Facebook ke bela digembar enggau gambar sida sebilik begulai enggau entua iya nya.
“Pemidang indai ke chukup disayau kami … siti pengelenyau besai dalam pengidup kami lalu kami chukup sinu.
“Kami enggau baruh ati minta semua sama besampi meri pengering ngagai kami napi penusah tu sereta ngenang enggau bebasaka pengawa ke udah digaga indai ke disayau,” ku iya.
Nanta madah Elizabeth ke mega bini ngagai ex-Speaker Kunsil Nengeri Sarawak Tan Sri Celestine Ujang udah ninggal kenang ke chukup besai ngagai genap orang ke dikelala iya.
“… pengingat manis tu deka seruran dikeingat dalam ati kami. Taja pan sinu enggau pemidang iya tang pengingat manis lebuh kami begulai deka nyadi penawar penyinu ati,” ku iya. – TVS
