KUCHING, 4 Okt: Sarawak nerima lebih 800 ripot bekaul kes salah guna media rama ngaul raban nembiak entara bulan Januari nyentuk Julai taun tu.
Sapit Menteri Nembiak, Lumba enggau Main Sereta Pemansang Orang Dagang Sarawak, Dato Gerald Rentap Jabu madahka, ripot nya nyengkaum kes beduan siber, nipu dalam tali arus sereta mayuh macham isu ke bukai.
“Lebih 800 kes ti dibantaika enggau diripotka ngagai raban Komisyen Komunikasyen enggau Multimedia Malaysia (MCMC), lalu ku raban Polis Diraja Malaysia (PDRM), ninting hari endang bisi kes ti diripotka.
“Ari sukut ripot, pengawa nasat agi dipejalaika enggau ke bukai,”ku iya.
Ku tandu Gerald, penanggul salah guna media rama ngaul raban nembiak ukai semina tanggungpengawa ejensi perintah aja, tang mega apai indai enggau komuniti.
Pemereti ati senentang chara nguna media rama ke betul patut diajar ari tumu dikena nyeliahka penanggul ti lebih besai nyadi dudi hari ila.
“Tang ti pemadu dikemeratka, penerang pasal pekara tu, kitai patut meri anak kitai peneleba ke lebih ngambika sida pintar dalam beratika nama utai ke betul enggau nama utai ke salah.
“Anang nganti pengilap nyadi, baru kitai deka ngangau polis tauka ngaga ripot ngagai MCMC,”ku iya.
Kelimpah ari nya, Gerald mega merambu ngambika undang-undang bekaul isu salah guna media rama diteritka dikena nentuka raban ti ngereja penyalah nya ditinggang ukum ke patut.
Iya madah, kaunsil perunding nembiak menua (MPBN) Renggat Nengeri Sarawak iya nya pantar intelektual ungkup raban tuai gerempung nembiak enggau pengari perintah nengeri sereta ejensi dikena berundingka pasal isu enggau pemar ke ditapi dalam ngemansangka raban nembiak ba semua renggat.-TVS
