BETONG, 4 Okt : Raban pengajar di wilayah tu patut nyikap diri enggau penemu Teknologi Pemadah enggau Komunikasyen (ICT) dikena napi pemar Revolusi Industri 4.0, ku Dr Rchard Rapu.
Kaban Parlimen Betong nya madah, tu endang antara atur pemadu manah nyadi pantar ngajar ke ngasi dikena nempa nembiak kreatif, inovatif engga kompetitif dudi hari.
“Diatu kitai meda tangungpengawa ba dunya pelajar udah berubah enggau chukup nyata enti dibanding enggau kelia.
“Bala nembiak ukai semina datai ke sekula endur belajar tang mega diajar nyadi lanting menua sereta nyadi modal mensia ke bepenemu enggau mereti.
“Nya alai, kitai patut sedia berubah dalam sistem pelajar nengah inovasi polisi sereta strategi ke dikereja sepanjai maya lebih agi maya menua nyingkang ngagai Revolusyen Industri 4.0,” ku iya maya bejaku ba Pengerami Apresiasyen Penyulut SPM 2023 enggau Hari Penyulut Akademik Semester 1 2024 Maktab Rendah Sains Mara (MRSM) Betong, pagi tadi.
Ku iya, sektor pelajar mega bisi kaul enggau proses ngajar sereta belajar ke disukung teknologi enggau pemansang sistem digital dalam pengawa belajar moden tu majak nerima perati ba renggat pelajar tinggi.
“Taja mayuh agi raban pengajar ba selampur menua agi nguna chara lama dalam pengawa ngajar tang kereban bantu teknologi mega enda tinggal diguna dalam kelas,” ku iya.-TVS.
