BETONG, 4 Okt : Perintah diansak terus meri perati ngagai pengawa ngaduka perengkaguna di sekula, sepital enggau klinik nyengkaum industri mit enggau jelan pemesai (PKS) ba menua pesisir patut diberi agih ke lebih besai dalam Bajet 2025.
Kaban Parlimen Betong, Dr Richard Rapu madah pekara nya beguna dikena nentuka sekula, seital enggau klinik ba menua pesisir terus lantang diguna mensia mayuh.
“Aku chukup ngarapka agih belanja ungkup sekula-sekula, sepital enggau klinik repuk ba sitak menua pesisir di Sarawak deka diberi perintah perati dalam bajet serak tu.
“Tu dikena nentuka servis, perengkaguna enggau kereban ke diguna lebih menyana ungkup pengelantang nembiak (sekula) enggau komuniti menua pesisir” ku iya.
Iya mansutka jaku nya rambau Pengerami Apresiasyen Penyulut SPM 2023 enggau Hari Penyulut Akademik Semester 1 2024 Maktab Rendah Sains Mara (MRSM) Betong, pagi tadi.
Udah nya iya madah, perintah mega patut ngemeratka agih belanja ungkup aktiviti ngadu dikena nyeliahka isu sekula, sepital enggau klinik repuk agi nyadi dudi hari.
“Udah tentu ungkup sekula ari segi agih belanja ngadu pan nya chukup beguna, nyema nadai belanja dikena ngadu, lama laun sekula nya deka repuk, nyadi perintah mesti meri agih belanja lebih dikena nentuka genap sekula ti patut diadu seruran bisi belanja dikena ngemanah.
“Bajet ungkup pemansang industri mit enggau jelan pemesai (PKS) sereta bekaul enggau industri bumai di menua pesisir antara pekara ke patut diberi perintah perati dalam Bajet 2025,”ku iya.-TVS.
