DARO, 3 Okt: Bekau ari kos pengidup ke majak niki, tebal agi bala pedagang di Daro ngarapka Bajet 2025 ulih diatur manah agi iya nya mungkur inisiatif bantu ngagai bala pedagang mit enggau jelan pemesai (PKS).
Sida ngarapka bisi bantu ari segi puku dikena bedagang, bantu belanja dikena meli kereban bedagang.
Siku Pedagang Mit enggau Jelan Pemesai (PKS) Ahmad Firdaus Othman ngarapka nengah Bajet 2025 tu perintah nyendiaka inisiatif belanja ngagai sida pedagag mit.
“Ungkup Bajet 2025, aku siku ari pedagang ngarapka ejensi perintah ulih nyendiaka belanja ngagai bala pedagang bejual baka pemakai.
“Ambika chunto begunaka mesin, mixer, mesin popcorn, waffle enggau ke bukai mih. Udah nya meri kus dagang chunto diatur ba Kuching, Institut Pedagang Menua (INSKEN) dikena nambahka penemu dikena bedagang,” ku iya maya dirandau TVS ditu empai lama.
Nangkan ke nya ba penemu siku agi pedagang mit, Mirawati Salleh ngarapka udah tu ila bisi bantu belanja ari perintah ngambia sida ulih ngerembaika agi dagang diri.
“Ba penemu aku pedagang ba pelilih Daro tu ngarapka diri diberi bantu belanja, bantu ke lebih dikena ngerembaika agi dagang kami diatu mih.
“Utai dikearap ke kami endang nadai utai bukai, iya nya minta perintah terus nyukung kami ke bedagang mit tu,” ku iya.
Pia mega ba penemu Sarija Sharkawi bela ngemeranka pengawa dagang madahka, nengah pemisi bantu ari perintah chukup beguna dikena ngelempungka tating belanja ditapi sida bekau ari kos pengidup ke majak niki.
“Aku ngarapka perintah meri bantu puku baka nya mih ngagai kami, awakka tating belanja ditapi kami lempung mimit…jam ke diatu ungkus idup majak niki.
“Kekadang penatai pemisi dalam sehari enda mayuh, kekadang semina pulai puku, ungkup upah, gaji,” ku iya.
Ke penerang Bajet 2025 dipelaba deka dibantaika Menteri Besai Datuk Seri Anwar Ibrahim di Parlimen kena 18 Oktober tu ila.-TVS
