KUCHING, 2 Okt: Jalai McDougall ditu deka ditutup sementara ngagai mensia mayuh kena 3 Oktober tu.
Tuai Polis Pelilih Kuching, Pemangku ACP Mohd Farhan Lee Abdullah madahka jalai nya deka ditutup berengkah ari pukul 8 pagi nyentuk pengawa tembu.
Pekara tu dikena meri ruang ngagai pengawa masang panggau besai beserimbai enggau achara bejalai bebala mayuh nyerumba ngintu pengerami Hari Pengada ti ke-78 Tuai Pemegai Menua Nengeri Sarawak.
Achara tu deka diatur kena 12 Oktober ba Padang Merdeka, ku iya dalam siti penerang ti dipansutka sehari tu tadi.
“Mensia mayuh ke nengah Jalai McDougall nuju ngagai Padang Merdeka dilalau ngambika ngaga pusing ‘U’ ba depan Plaza Aurora,” ku iya.
Nangkan ke nya iya mega ngelalau penguna jalai raya ngambika enda ngengkah kerita ba tisi jalai ungkup pengelikun sereta dikena ngelanchar jalai ba endur nya.
Penerang silik kita ulih betelefon ngagai Begian Tasat enggau Penerit atur Trafik Pelilih Kuching ba lumor telefon 082-259900. TVS
