KAPIT, 30 Sept: Perintah Besai ngemendarka ungkup penyampau RM2 juta dikena mutarka penanggul tanah tusur ba Rumah Robert Nanga Sebatu, ti bedampih enggau sungai.
Menteri Besai, Datuk Seri Anwar Ibrahim madahka enti nyema enda diputarka enggau lengkas, penanggul nya deka ngeruga kandang endur ba rumah panjai tiap kali ai pasang besai nyadi.
“Tadi aku udah madahka ngagai raban Opis Menteri Pekara Wang ba mua Datuk Seri Alexander Nanta Linggi dikena nentuka kitai (perintah) bisi penyampau ungkup ke diguna nya.
“Laban kitai deka menteri-menteri meri pemendar projek dulu tang duit nya tauka agih belanja nadai tauka enda chukup,” ku iya.
Iya madah munyi nya lebuh bejaku ba Pengerami Ramah Mesra Begulai enggau Tuai Komuniti Rumah Panjai Bagi Menua Kapit di Rumah Robert Nanga Sebatu, kemari.
Ku iya madah enti nyema penanggul tu majak nyadi sereta enda diputarka lengkas pekara tu begunaka kos ti tinggi.
Sebedau tu, Anwar mega ngulu Pengerami Nasih Tanah projek baru pemansang Indu Opis Pelilih Kapit.
Iya mega disempulang Premier Sarawak, Datuk Patinggi Tan Sri Abang Johari Tun Openg, Menteri Kereja Raya, Datuk Seri Alexander Nanta Linggi enggau Menteri Dalam Menua Datuk Seri Saifuddin Nasution.
Ba pengerami nya, Anwar Ibrahim enggau Abang Johari diberi licha senentang pengerembai projek nya.
Menteri Besai nya mega nyain plak nyadika kelai bejadika taba projek baru pemansnag indu Opis Polis Pelilih Kapit.
Ke penerang, Indu Opis Polis Pelilih (IPD) Kapit ke baru nya deka digaga enggau nguna ungkup penyampau RM150 juta.
Sebedau tu Datuk Seri Saifuddin Nasution Ismail madahka IPD Kapit diklasifikasyen nyadi Kategori C enggau disempulang Tuai Polis Pelilih (KPD) bepangkat Sapit Superintenden.
Ku iya madah, opis menteri nya nerima peminta ngambika IPD Kapit diangkatmanah nyadi Kategori B ke deka diuluka tuai polis pelilih ti bepangkat Superintenden.-TVS
