ENGKILILI, 30 Sept: Rayat mayuh lebih agi ba sitak Parlimen Lubok Antu patut nguna manah peluang ari genap aktiviti ke bisi diatur perintah.
Kaban Parlimen Lubok Antu, Roy Angau Gingkoi madah, pekara nya beguna dikena nentuka sida ngelala genap polisi kelimpah nemu penerang pemadu baru ari ejensi ke bekaul.
“Utai tu ulih nguntungka rayat kebendar iya laban enti baka opis betanam betupi bisi datai ngagai kita kitu sida iya meri penemu ngagai kita.
“Pia mega enti bisi opis pengerai datai sida iya ulih meresa (pengerai) kita.
“Kekadang kitai ke ari ulu enda ulih datai beperesa ke klinik ke sepital, nyadi enti sida bisi ditu guna mih peluang nya,” ku iya.
Iya madah munyi nya maya Nutup Program Wai FM diatur Opis Betanam Betupi Engkilili ba Rumah Panjai Will, Stuga ditu malam kemari.
Ku iya, Tuai Raban Bansa enggau Tuai Rumah (KMKK) patut bejalaika tanggungpengawa meri sukung penuh ngagai program baka nya ke pemaik nembiak redak diri.
Tandu iya, ari program baka nya rayat ari menua pesisir ulih berandau terus bekaul enggau pekara ke deka ditemu sida enggau bala pegawai tauka tuai-tuai opis perintah ke bisi datai.
Berebak enggau nya, Roy bisi ngemendarka agih belanja RM200, 000 ungkup Projek Jalai Rumah Panjai enggau RM100,000 dikena ngemanah Rumah Panjai Will.
Kelimpah ari nya, RM30, 000 diagih ungkup Komiti Pemansang enggau Pengelikun Genturung Pendiau (JKKK) enggau Biro Indu rumah panjai nya nengah Projek Mit Pemansang Menua Pesisir (MRP).-TVS
