SARATOK, 29 Sept: Raban Sarawak Energy Berhad enggau anak serikat iya Sesco Berhad udah digerah ngambika nyidi kebuah penyadi chaj karan niki pengudah meter pintar dipasang ba rumah penguna.
Menteri Utiliti enggau Telekomunikasi (MUT) Sarawak, Dato Sri Julaihi Narawi madah, raban sida mega deka bejalaika atur silik bekaul enggau penanggul nya udah tu.
“Aku udah ngangauka raban Sarawak Energy Berhad enggau anak serikat SESCO ngambika ngelala bagi penyilap ngujungka mayuh sebana diterima bekau ari pengawa masang meter pintar.
“Nyadi aku deka bejalaika atur nengah SESCO enggau Sarawak Energy Berhad ngambika nadai orang saru penemu pasal pengawa masang meter pintar ba selampur Sarawak,” ku iya.
Iya madah munyi nya maya meri timbal bekaul enggau isu masang meter pintar ngujungka nerima bemacham timbal ari penguna nyerumba Pejalai Gawa Ngagai Loji Kaki Wong ditu pagi tadi.
Ku iya, mensia mayuh mega patut nemu tuju pengawa masang meter pintar nya ngambika bacha nguna karan seruran betul.
Tandu iya, genap sebana ari mensia mayuh bekaul enggau pekara nya deka diambi perati lalu sida deka bejalaika atur ti patut ngambika mensia mayuh enda saru penemu.-TVS
