SARATOK, 29 Sept: Perintah Sarawak udah ngemendarka belanja urung RM100 juta dikena ngemanah Loji Ai Beresi Kaki Wong di Saratok.
Menteri Utiliti enggau Telekomunikasyen (MUT) Sarawak, Dato Sri Julaihi Narawi madah, projek nya deka berengkah pun taun baru lalu enti udah tembu iya deka mekalka urung 60 juta liter ai sehari dibanding semina 30 juta liter ai jam ke diatu.
“Aku ngasai enda kurang ari RM100 juta nyadi 30 juta liter ai sehari ngagai 60 juta deka begunaka belanja abis nadai RM100 juta.
“Nyadi tu agih belanja ari Perintah Sarawak tang aku enda ulih madah nyemetak penyampau kos laban JBALB deka nentuka penyampau ke silik.
“Taja pia kitai deka ngaga iya pemadu tumu pan pun taun baru. Tu sebagi ari pelin dipejalaika kitai udah tu ila,” ku iya.
Iya madah munyi nya rambau pejalai gawa ngagai Loji Ai Beresi Kaki Wong ditu pagi tadi.
Udah nya, Julaihi mega madah projek nya sebagi ari dua pelimn besai bekal ai enggai sistem grid bekai ai Sarawak ke benung dipejalaika MUT diatu.
Ku iya, tu chukup beguna ngambika nadai agi sebana suntuk bekal ai didinga ari pengani ke diau ba pelilih Saratok, Debak, Pusa enggau Beladin.
Nangkan ke nya, Julaihi mega madah MUT diatu benung ngerumban pengawa ngaga ‘Acute System Water’ ba Loji Ai Beresi Lichok di Roban.
Udah nya ba endur bukai baka di Pelilih Betong pengawa ke sama deka digaga ba Loji Ai Beresi Lubau lalu penembu projek tu ngambi awak pengelama 24 bulan.-TVS
