SARATOK, 29 Sept: Urung 61 projek ganti enggau ngemanah paip beungkus RM45 juta udah dikelala ba bagi menua Betong.
Menteri Utiliti enggau Telekomunikasi (MUT) Sarawak, Dato Sri Julaihi Narawi madah, projek nya sebagi ari pengawa opis menteri dikena nentuka bekai ai di Betong seruran chukup.
“Kitai udah ngelala 61 projek ganti enggau ngemanah paip lalu kitai meri agih belaja RM45 juta dikena bejalaika pengawa nya udah tu ila.
“Nyadi tu sebagi ari chara dikena kitai nentuka bekal ai (chukup) laban kitai enggai nyema ai kelalu deras nya mega ulih ngujungka paip bumbus ari paip ke lama kelimpah ari ulah vandalisme,” ku iya.
Iya mansutka jaku nya pengudah pejalai gawa ngabas Loji Ai Beresi Kaki Wong ditu pagi tadi.
Ku tandu iya, kerejasama ari mensia mayuh lebih agi tuai raban bansa enggau tuai rumah (KMKK) ba sesebengkah rumah panjai beguna dikena nentuka kes vandalime ke ngaul paip JBALB ulih disekat.
Nya alai, penembu projek nya ila dikearap deka meri pengelantang ngagai peranak di Betong ngasaika bekal ai beresi ke chukup.
Ku iya, pejalai projek nya sebagi ari pelin besai ai Sarawak enggau Pelin Besai Sistem Grid Sarawak ke benung dipejalaika di Betong.-TVS
