KUCHING, 28 Sept: Premier Sarawak, Datuk Patinggi Tan Sri Abang Johari Tun Openg diberi basa nyadi penerima Anugerah Khas Ungkup Penyulut nyadi ketuai serantau ungkup Dagang Temuai: ‘Champion Pemansang Meruan’ nyerumba Pengerami Makai Lemai Gala Anugerah Dagang Temuai Hornbill Sarawak Ke-9, malam tadi.
Tanda basa nya diberi dikena ngelai pemadas pengawa ke udah dikereja Abang Johari dalam meri empas besai enggau meruan ngagai landskap dagang temuai di Sarawak.
Pengerami nya mega ngemataka Anugerah Khas Hornbill – Penyulut Seumur Idup diberi ngagai Datuk Aloysius J. Dris berekat pemadas pengawa iya ke chukup besai dalam mantu ngangkatka industri dagang temuai ngagai tikas ke lebih manah
Iya mai pulai perais trofi enggau setipikit ti disuaka abang johari ba pengerami ke diatur ba Hikmah Exchange Event Centre (HEEC) Hari Lima.
Udah nya, program ‘Sia Sitok Sarawak’ ari Sarawak Tourism Board (STB) enggau Sarawak Tourim Federation (STF) bela nerima Anugerah Khas Hornbill – Covid-19.
Anugerah nya disuaka Menteri Dagang Temuai, Industri Kreatifenggau pemansang pedagang sarawak, Dato Sri Abdul Karim Rahman Hamzah ngagai Tuai Pegawai Eksekutif Sarawak Tourism Board (STB), Sharzede Datu Salleh Askor.
Udah nya, ungkup Kategori Buding Pemadu Manah, Hotel The Waterfront dipadu nyadi pemenang kategori 5 bintang enggau pemenang kategori 4, 3, 2 enggau 1 bintang iya nya dipenggi Hotel Imperial Palace, Miri enggau Inn 86, Bintulu.
Tanda basa ungkup kategori peneleba Inap Desa Pemadu Manah dipenggi Bala Metu Homestay, Bario Highland.
Kategori Penyedia Dagang Temuai Perubat Pemadu Manah ungkup kategori Dagang Temuai minat khas pemadu manah dipenggi Timberland Medical Centre.
Kategori nya mega dimenang Aramaz Borneo (MM2H Sdn. Bhd) ungkup Anugerah Ejen SMM2H Pemadu Manah seraya Curtin University Malaysia dipadu nyadi pemenang Anugerah Pemekal Pelajar Antarabansa Pemadu Manah ungkup kategori ke sama.
Ba kategori Pematak Pemadu Manah, Taman Negara Mulu pemadu atas ungkup Anugerah Pematak Temuai Pemadu Dikerindu, ditangkan Penan Women Project arI P.W.P Company menang Anugerah Inisiatif Dagang Temuai Bepelasarka Komuniti Pemadu Manah.
Sarawak Cultural Village Sdn. Bhd enggau Sarawak Adventure Challenge bela menang Anugerah Ungkup Kategori Peneleba Achara & Pengerami Dagang Temuai Pemadu Manah.
Anugerah bukai nyengkaum kategori Peneleba Makai, Perunchit enggau Rekreasyen Pemadu Manah, Promosyen Pemadu Manah enggau Bantu Media Rama ngagai kategori Industri Dagang Temuai Pemadu Manah enggau Kategori Malin Temuai Pemadu Manah.
Semua pemenang bela nerima perais iya nya trofi, setipikit enggau mata duit penyampau RM5,000 ti disuaka Abdul Karim enggau sapit iya, Datuk Sebastian Ting.-TVS
