KUCHING, 26 Sept: Atlit Para Sarawak terus mandangka rikod nyulut nengah japai midul emas, pirak enggau engkeraju lebih agi ba achara nikau peluru lelaki kategori F41 ba Lumba Para Malaysia (SUKMA) ke-21, sehari tu.
Midul emas sehari tu diulih nengah Richard Bada ke mujur tetikauka penyauh 7.73 meter ditangkan midul pirak dipenggi Teckman Mary (6.92 meter), enggau midul engkeraju diempu Abdullah Syawal enggau rikod 5.79 meter.
Ku Richard, midul emas nya ngenapka emas hatrik iya ba lumba serak tu ungkup kontinjen Sarawak.
“Aku chukup gaga, rindu ati laban ketetiga achara aku semua bulih midul emas.
“Aku beterima kasih ngagai kami sebilik, jurulatih enggau kami sebilik ke semampai nyukung aku,” ku iya maya Pengawa Nyuaka Midul ungkup pemenang ba Stadium Sarawak, Kuching, sehari tu tadi.
Tandu Richard, iya endang udah nyikap diri tumu sereta sigi bebendar deka menang midul emas.
“Aku udah belatih kenyau setaun ke udah lalu Puji Tuhan semua iya mujur.
“Langgur aku udah tu ila, aku ngarap diri dipilih masuk pekit antarabansa, Asian Para Games (Lumba Para Asia 2025),”ku iya.
Ke penerang, Richard Bada udah menang dua midul emas ba achara nikau chakera enggau nikauka sangkuh kategori lelaki F41. – TVS
