BETONG, 26 Sept: Pengawa ngatur Program ‘Sustainable Modern Agriculture Through Rural Technoprenuership’ (SMART) dikeandal ulih mai ubah ngagai bidang betanam betupi di menua pesisir.
Sapit Menteri Industri Pemakai, Komoditi enggau Pemansang Wilayah Sarawak (M-Ficord) Datuk Martin Ben madah, komuniti enggau raban nembiak endang raban ke diselinting ungkup program nya ba menua pesisir ngambima ulih besemekih enggau nyungkak penatai pemisi sida.
“Nya mih dikeandal kitai lalu aku arapka sida ke bekaul bulih pemaik ari program ke diatur tu baka nemu nguna kereban teknologi pemadah (ICT) enggau mega mesin-mesin baru.
“Nyadi pemisi kereban teknologi u deka ngurangka sida kelalu bepanggai ngagai pengawa ngaji mensia tambah mega diatu udah bisi kereban digital.
“Nya alai semua nya deka mantu nambahka asil produktiviti enggau mega mantu sida ngelimat belanja dikena ngatur kebun diri,” ku iya.
Iya madah munyi nya maya dirandau media pengudah nyuaka setipikit ngagai bala penyereta Program
‘Sustainable Modern Agriculture Through Rural Technopreneurship’ Renggat Keterubah 2024 diatur ditu empai lama.
Ku terang iya, raban orang bumai patut berunding tebuka sereta ulih besemekih dikena nambahka produktivi diri enggau nyapai juluk Perintah Nengeri deka nyadi sebuah wilayah bepenatai pemisi tinggi manggai taun 2030.
Udah nya ku iya, pekara nya mega antara tujuh pugu besai dala Pelin Pemansang Pasca Covid-19 (PCDS) 2030.
Dulu ari nya, bisi 17 penyereta nyengkaum raban nembiak ba Betong bela udah nembuka kus ke diatur pengelama 21 hari dibaruh Program Latih enggau Pemansang ICT Menua Pesisir Renggat Keterubah diatur M-Ficord ditu.
Sama bisi datai Tuai Penulung Seksyen Pemansang Menua Pesisir enggau Komoditi Mohd Ashree Wee ngarika Sekretari Mendam M-Ficord Sarawak Datu Edwin Abit.-TVS
