SRI AMAN, 26 Sept: Mensia mayuh dilalau patut seruran nemu penyadi ubah gaya hari bekau ari pangka monsun ke berengkah bulan tu tadi nyentuk bulan November ti deka datai.
Tuai Opis Bomba enggau Penyah Penusah Malaysia Zon Tiga Sri Aman, Penguasa Bomba (PgB) Muhammad Rais Adham Rosalan madah, mensia mayuh lebih agi sida ke diau semak sungai patut ngadang lebuh ujan bangat tauka kudi laban nya ulih ngujungka penyadi ampuh bah enggau tanah tusur.
“Aku deka ngelalau mensia mayuh ngambika seruran ngadang enggau ngelala ubah gaya hari tu.
“Sida ditangkan patut ngurangka sebarang aktiviti ba ai dikena nyeliah penusah emejensi tauka pekara ke enda disadang nyadi.
“Pia mega bala apai indai patut seruran matau anak mit awak enda bemain ba parit rumah tauka kandang sungai semak rumah laban kitai nemu ubah gaya hari tu ujan ke berunggu deka ngujungka ai deras.
“Kelimpah ari nya aku ngelalau bala deriba tauka penguna jalai raya patut seruran nemu pendiau jalai raya ke lichin dikena nyeliahka sebarang penusah aksiden,” ku iya.
Muhammad Rais madah munyi nya maya dirandau TVS ba opis iya empu, sehari tu tadi.
Ku tandu iya, raban Bomba enggau Penyah Penusah Zon 3 Sri Aman udah bejalaika inisiatif suah agi matau kandang endur ke mudah kena penusah ampuh bah enggau tanah tusur ba tiga sitak ke dijaga.
Berebak enggau nya, ejensi Penyangga Penusah Menua Opis Menteri Besai nengah laman Facebook sida madahka, rengat keterubah penyadi monsun ba menua dipelaba berengkah 24 September nyentuk pun bulan Nomber tu ila.
Bepelasarka penerang nya, renggat pemungkal monsun tu nyadi bekau ari pengabis monsun barat daya ke berengkau kenyau 17 Mei suba.-TVS
